Padala

Magmumula sa internet ang reference number
ang amount, currency at kung sino ang remitter,
Sa tatlong letrang initials ng isang bangko sa Adriatico --
dito, ang transaksyon ay mabusising ipoproseso;

Pipila ka sa general transaction
Hindi sa depository and withdrawal section
"Fill out this form and wait for the authorization,
It will take 30 minutes or more, pasensya na po Sir."

Bitbit ang pasaporte o kaya nama'y two valid IDs
Sa pagkuha mo nito, 'wag kang umasang mabilis!
Kamalas-malasan pa kung chika pa nang chika
ang magkatabing teller sa magkabilang linya!

Sa wakas, makukuha mo na rin ang inaasam na padala
Pambayad sa bill, sa utang at matrikula --
Pagdampi ng ilang papel sa iyong mga kamay
bibilang lang ng oras at sa iba na ibibigay;

Ipagdarasal mong sa paglabas mo ng bangko
walang masang loob ang nag-aabang sa'yo,
Minabuting magsuot ng 'di kagaraang damit
para 'di halata sa mga mata ng "gumagamit;"

Remittance, sinasabing backbone of the economy
Patitikasin ang beneficiary sa sandali ng ligalig
Dugo at pawis, sa banyaga -- nagpaalipin,
Padala -- hindi sa kawalan lang ang dapat mong sapitin!