Bukas Ba Ang Third Eye Mo?

Sa Pilipinas, ang third eye ay isang konseptong kinakatawan ng mga natatanging taong may ganap na kakayahang sumalikop sa daigdig na sadyang iba sa mundong kinalalagyan ng sangkatauhan. Ekstraordinaryo, ito ang salitang makapaglalahad ng tunay na larawan ng mga taong mayroon nito.

Bagaman tayo ay nabibilang na sa mundong may malakas na impluwensya ang teknolohiya, may ilang sitwasyon na magbibigay patotoo na marami pa rin sa ating paligid ang hindi natin lubusang maiintindihan.

Pilit mang ikinukubli ng pagkakataon ang mga kuwentong naglalarawan sa third eye, hindi pa rin maiaalis ang pagdaloy ng mga natatanging kuwento nito patungo sa makabagong panahon. Ikinakahon man ang konsepto ng third eye bilang bahagi lamang ng mga lumang kuwentong bayan at elementong resulta lamang ng pagkalayo sa urbanisasyon kundi sibilisasyon -- ito ay isang bagay na bumubuhay sa ideyang sadyang may mga bagay na hindi mabibigyang katuturan ng tao at ng agham.

Kababalaghan man para sa iba, Malas naman ang tingin ng ilang grupo. Anuman ang tindig ng bawat indibidwal sa puntong ito ay maisasabalikat na lamang sa dahilan nagkakaiba-iba ang tao. Maaring lingid nga sa kaalaman ng mga tao ang konsepto at tunay na ideya ng third eye dahil sa napakaraming salik: (1) pagkatakot na harapin ang katotohanan ng third eye; (2) pagkatakot sa epekto ng third eye dulot ng ilang kuwentong may masaklap na pagkakalahad; (3) kasalatan ng mga tagapaghalina sa paksa tulad ng komunikasyong pangmasa .

Ang third eye ay maaring katutubo at aktwal nang bukas para sa iba samantalang kagustuhan naman ng iba ang pagpapabukas nito. Ang hiwaga at misteryo ng third-eye sa kasalukuyang panahon ay maaring umani ng iba’t ibang reaskyon katulad ng inaasahan. Subalit nararapat isaisip na ang pagkakaroon ng bukas na third-eye ay hindi kailanman kasalanan ng kung sino man, ito ay isang istrukturang nagtatagli pa rin sa kasalukuyang kamalayan at lunduyan ng mga elementong hindi nakikita. Ang third-eye ay hindi piksyon, kathang-isip o produkto ng tinatawag nilang subconscious mind.

Nanatili sa ating mga tao ang magiging tadhana ng third-eye. Ngunit bilang kabahagi ng lipunan, hindi nararapat makadama ng anumang pagtatangi o pagtatambis ang may mga bukas na third-eye. Nararapat lamang linawin na sila ay hindi iba sa lipunang ating ginagalawan.