Interconnectedness

“Kaya hindi nawawalan ng katwiran, hindi nawawalan ng dahilan dahil bawat isa ay kawing ng iba pa. Ang pinaghuhugutan ng lakas ng isang mahina ay ang sandigang matibay na dating mahina. Unti-unti, pinalalakas natin ang bawat isa sa hindi mapapansing galaw. Ito ang buhay, at hindi natatapos ang buhay sa pagsasagisag ng mga salita. Ayaw nating nakakahon, gusto nating lumaya...”

Ang pag-aaral sa lipunan ay tuloy-tuloy, dinamiko at nagbabago. Sa napakalawak na sakop nito, ngayon ang pinaka-angkop na panahon upang tingnan ang bahaging kinapapalooban ng lahat ng may buhay, sariwain ang mga isyung pangkalikasan at magnilay kung aling bahagi ba ng ating sarili ang naibahagi natin sa kalikasan? – sa kalikasang pinagkukunan natin ng natatanging yaman.

Sa panahon ng kawalang katiyakan, maraming mga bagay ang naisasantabi. Maraming mga buhay ang nakukompromiso. Ito ay isang pagsubok – kung tayo ba ay kikilos upang bigyang ayuda kundi man solusyon ang laganap na krisis sa ating kapaligiran o ipagkikibit balikat na lamang natin ang mga ito.

Kung susuriin, ang patuloy na pagbabago sa kapaligiran ay dulot ng mga atrasadong hakbangin ng mga taong pabaya, walang pakialam at nagnanais isulong ang pansariling interes at hindi ang kagalingang panlahat. Sa napakaraming problemang kinakaharap ni Mang Juan, hindi na nito malaman kung saan pa huhugot ng enerhiyang magbibigay solusyon sa lumalalang isyung pangkalikasan. At, dahil tayong lahat ay gumagalaw sa iisang kapaligiran, mahalagang malaman natin ang mga hiling at hinaing nito. Ang paksang ito ay hindi lamang limitado sa laban ng Inang Kalikasan bagkus masisilayan ang mga kagyat na epekto nito sa napakaraming aspeto/sektor ng lipunan.

Sana’y hindi pana-panahon lang ang pakikibaka para sa laban ng kalikasan dahil ang laban ng kalikasan ay laban nating lahat.