Kamera

Ang photojournalism ay ang paggamit ng masining na potograpiya upang ipakita ang isang paksa o storyline. Ang mga photojournalists ay kadalasang gumagamit ng human-interest stories upang ipakita ang natural na arte ng tao na ikukulong sa isang tema. Halimbawa, ang lokasyon ay Post Office sa Maynila. Higit na makapupukaw pansin ang pagkuha sa natutulog na paslit o musmos sa mahabang baitang ng post office kaysa ang pagkuha sa kabuuan ng istruktura ng Post Office mula sa malayong anggulo. O kaya naman, mas nakakaaliw tingnan ang mga nagtitindang tulog kasabay ng mga dyip na nagdaraan kaysa ang palasak na pagkuha sa fountain area ng lokasyon. Isa pang halimbawa, sa piket line, kung saan mas magiging epektibo ang pagdaloy ng istorya kung makakakuha ng litrato ng mga musmos na may hawak ng plakards kaysa sa karaniwang may hawak nito.

Sa anggulo, maaring gumamit ang mga photojournalists ng mga natatanging elemento ng kalikasan -- tubig, kahoy, apoy at iba pa, kahit nga bato. Minsan, ang mga inosenteng ngiti ng kabataan na nagtatampisaw sa tubig, bagaman madrama ay siyang bubuod sa isang human interest story.

Alam ng mga photojournalists (dahil na rin sa nahasa ng karanasan + napag-aralan o sadyang may talento na) ang pinakaangkop na anggulo at effects para sa isang momento. Sa tulong ng makabagong potograpiya, mas nagiging masigla ngayon ang paglalapat ng kulay sa mga ito. Ang pinakamadalas gamitin ngunit sa tingin ko'y hindi nalalaos na anggulo sa pagkuha ay ang framing. Sa gitna ng dalawang sanga ng puno, makikita ang mag-ina habang pinapakain ng nanay ang kanyang anak. Gayundin, ang paghanap sa butas ng isang solidong bagay; sa butas na iyon, kukuha ng tamang anggulo upang matiyempuhan ang nais mong kuhanan. Ang mga ito ay halimbawa ng framing o pagkakahon sa target.

"Hangarin mong maipabatid sa tao ang larawan ng isang karaniwan o pambihirang senaryo na may kabuluhan. Gamit ang kamera, isang mabisang paraan ito upang mapaalala na ang ilang pinakamagagandang tagpo ay makikita pa rin sa ating kapaligiran. Ang hamon dito ay kung paano yayakapin ng mga larawang ito ang isang kakaibang istoryang malayo sa ipinababatid ng postcards..."

Pasubong bata. Kutsarang halos naipasok na sa bibig.
Tumatalong mga bata sa malakas na ulan. Pagtiyempo sa lutang na imahe nila sa pagtalon.
Nagsusulat sa ilalim ng puno habang nalalagas ang mga tuyot na dahon nito.
Maging ang simpleng ngiti at titig. Lahat ito, mahalaga sa pagbuo ng kwento nila.

*Isang paslit sa Gawad Kalinga, Baseco Compound